ལས་ཁུངས་ངོ་སྤྲོད།

བཀའ་བློན་སྤེན་པ་ཚེ་རིང་མཆོག་གི་ལོ་རྒྱུས་སྙིང་བསྡུས།

༄༅། །བཀའ་བློན་སྤེན་པ་ཚེ་རིང་མཆོག་ནི་ཕྱི་ལོ་ ༡༩༦༧ ལོར་སྦེལ་ཀོབ་ལུགས་བསམ་གཞིས་ཆགས་སུ་ཕ་བློ་བཟང་སྙན་གྲགས་དང་། མ་མཚམས་ལགས་གཉིས་ཀྱི་བུར་འཁྲུངས། གཅེན་གཅུང་དགུ་ཡོད་པའི་གསུམ་པ་ཡིན་ཞིང་། འཛིན་རིམ་དགུ་པ་ནས་འཛིན་རིམ་བཅུ་གཉིས་བར་ལོ་གསུམ་དང་ཕྱེད་ཀའི་རིང་ལུགས་བསམ་དབུས་བོད་སློབ་ཀྱི་སྤྱི་ཁྱབ་རྒན་བདག་ཏུ་འདེམས་བསྐོ་བྱུང་ཡོད་པ་དང་། རྒྱ་གར་རྒྱལ་ཡོངས་འཛིན་རིམ་བཅུ་གཉིས་པའི་ཡིག་རྒྱུགས་ཆེན་མོའི་ནང་བོད་པའི་སློབ་ཕྲུག་ཡོངས་ཀྱི་རྒྱུགས་འབྲས་ཨང་དང་པོ་ཐོབ་ཡོད།

ཕྱི་ལོ་ ༡༩༨༥ ནས་ ༡༩༨༨ བར་མ་དྷ་ར་སི་ཁི་རི་ཤན་མཐོ་སློབ་ཏུ་ (Christian college) དམིགས་བསལ་དཔལ་འབྱོར་རིག་པ་ (Economics major) སློབ་གཉེར་བྱེད་སྐབས། ཏ་མིལ་ནཱ་ཌུ་དང་པོན་ཌི་ཅེ་རི་ས་གནས་རང་བདེན་ཚོགས་ཆུང་གསར་འཛུགས་ཀྱིས་དྲུང་ཆེའི་འགན་ཁུར་བླངས་པ་དང་། དེ་མཚུངས་སུ་རྒྱ་གར་རྒྱལ་ཡོངས་ནའེ་ཇི་རི་ཡ་དང་བོད་རིགས་སློབ་ཕྲུག་མཐུན་ཚོགས་གསར་འཛུགས་སུ་མཉམ་ཞུགས་ཀྱིས་དྲུང་ཆེའི་ལས་འགན་ཁུར་གནང་།

ཕྱི་ལོ་ ༡༩༩༤ ནས་ ༡༩༩༧ བར་མདོ་སྨད་དབུས་རྒྱུན་དྲུང་ཆེའི་ལས་འགན་བཞེས་ཡུན་རིང་། ཕྱི་ལོ་ ༡༩༩༥ ལོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༦༠ ཕེབས་པའི་མདོ་སྨད་བརྟན་བཞུགས་གོ་སྒྲིག་ཚོགས་ཆུང་གི་འགན་འཁུར་བ་དང་། རྒྱ་གར་ནས་བོད་བར་ཞི་བའི་གོམ་བགྲོད་གོ་སྒྲིག་ཚོགས་ཆུང་གི་ཚོགས་མི་སོགས་གནང་། དེ་བཞིན་ ༢༠༠༥ ལོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༠ ཕེབས་པའི་མདོ་སྨད་བརྟན་བཞུགས་གོ་སྒྲིག་ཚོགས་ཆུང་གི་ཚོགས་མི་དང་། ༢༠༡༥ ལོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༠ ཕེབས་པའི་མདོ་སྨད་སྐུའི་གྱ་སྟོན་གོ་སྒྲིག་ཚོགས་ཆུང་གི་སློབ་སྟོན་པའི་འགན་ཁུར་བཞེས་ཡོད།

ཕྱི་ལོ་ ༡༩༩༦ ལོར་སྐབས་ ༡༢ པའི་མདོ་སྨད་སྤྱི་འཐུས་སུ་བདམས་ཐོན་བྱུང་ཞིང་། ༢༠༠༡ ལོར་སླར་ཡང་སྐབས་ ༡༣ པའི་མདོ་སྨད་སྤྱི་འཐུས་སུ་བདམས་ཐོན་བྱུང་སྟེ་རྒྱུན་ལས་བྱེད་མུར། བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་ངེས་སྟོན་པར་འདེམས་བསྐོ་བྱུང་བ་ལྟར། ཕྱི་ལོ་ ༢༠༠༨ བར་ལོ་ངོ་བདུན་ལྷག་རིང་འགན་ཁུར་བཞེས་སྐབས། ཕྱི་ལོ་ ༢༠༠༣ ལོ་ནས་འགོ་བཙུགས་ཏེ། ལོ་ལྟར་འཛིན་གྲྭ་ ༡༡ དང་། མཐོ་སློབ་སློབ་ཕྲུག་ལ་མ་འོངས་འགོ་ཁྲིད་ཀྱི་སྦྱོང་བརྡར་དྷརྨ་ས་ལར་གོ་སྒྲིག་གནང་ཡོད་པ་དང་། རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་སླར་གསོ། རྒྱ་བལ་གཉིས་ཀྱི་ས་གནས་འཐུས་མི་ཚོགས་འདུ་ཕལ་མོ་ཆེའི་སྐབས་སུ་སྦྱོང་བརྡར་དམར་ཁྲིད། བོད་མི་མང་སྤྱི་འཐུས་དང་ལས་བྱེད་བཅས་པར་རྒྱལ་སྤྱིའི་རང་བཞིན་ལྡན་པའི་སྦྱོང་བརྡར་དང་བགྲོ་གླེང་ཚོགས་འདུ་གོ་སྒྲིག་ཐེངས་མང་གནང་ཡོད་པ་དང་། སྤྱི་འཐུས་ ༡༡ ལས་གྲུབ་པའི་ཚོགས་ཆུང་ཞིག་བོད་དོན་དྲིལ་བསྒྲགས་དང་། རང་སྐྱོང་གནས་བབ་སློབ་སྦྱོང་ཆེད་ཡུ་རོབ་རྒྱལ་ཁབ་ཁག་འགར་སྐོར་སྐྱོད་གནང་བ། ལྡི་ལིར་རྒྱ་གར་གྱི་མཁས་པ་དང་། གནད་ཡོད་མི་སྣ་གདན་ཞུས་ཀྱིས་ལོ་ལྟར་བོད་དོན་དང་འབྲེལ་བའི་གནད་དོན་ཐོག་བགྲོ་གླེང་ཚོགས་འདུ་ཐེངས་མང་གོ་སྒྲིག་གནང་ཡོད་ལ། རྒྱལ་སྤྱིའི་བོད་དོན་རྒྱབ་སྐྱོར་ཚོགས་ཆེན་ཐེངས་ ༣ པ་དང་ ༤ པ་གཉིས་གོ་སྒྲིག་གི་འགན་ཁུར་བླངས་པ་དང་། ལོ་ངོ་ ༨ ཙམ་ལ་འཚོགས་ཐུབ་མེད་པའི་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་ ༤ པ་གོ་སྒྲིག་གི་རྐང་འགན་བཞེས་པ་སོགས་ལས་དོན་སྣེ་མང་བསྒྲུབས།

ཕྱི་ལོ་ ༢༠༠༨ ཟླ་ ༡༢ ཚེས་ ༡༦ ནས་སྤྱི་འཐུས་ཚོགས་གཙོའི་ལས་ཁུར་བཞེས་རྗེས། སྤྱི་འཐུས་རྣམ་པ་ས་ཁོངས་ཆ་བགོས་གནང་སྟེ། ལོ་གཉིས་དང་ཕྱེད་ཀའི་རིང་ས་བགོས་ཕྱོགས་སྐྱོད་ཀྱི་ལམ་སྲོལ་བཟོས་པ་ད་ལྟའི་བར་དུ་འགྲོ་བཞིན་པ་དང་། ཆབ་སྲིད་སྡེ་ཚན་རྒྱ་བསྐྱེད། རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་ ༥ པ་དང་ ༦ པ་གོ་སྒྲིག་ལེགས་གྲུབ། ༢༠༡༠ ལོར་མང་གཙོ་དབུས་བརྙེས་ནས་ལོ་ངོ་ ༥༠ འཁོར་བའི་དུས་དྲན་དང་བོད་གཞུང་མང་རྒྱལ་ཡོངས་ཚོགས་ཆེན་སྦེལ་ཀོབ་གཞིས་ཆགས་སུ་བསྡུ་བསྐོང་། ༢༠༡༡ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་ཀྱི་སྐུ་དབང་མང་ཚོགས་ལ་གསོལ་སྩལ་མཛད་སྐབས། སྐབས་དེའི་ཁྲིམས་བཟོའི་བརྒྱུད་རིམ་ཡོངས་སུ་རྫོགས་པར་སྟངས་འཛིན་དང་། དེ་བཞིན་དམིགས་བསལ་ཚོགས་ཆེན་ཐེངས་ ༢ པ་བསྐོང་ཚོགས་ཀྱི་འགན་ཁུར་འཐུས་གཙང་བཞེས་ཡོད།

ཕྱི་ལོ་ ༢༠༡༦ ཟླ་ ༨ ཚེས་ ༢༥ ཉིན་ནས་ཕྱི་ལོ་ ༢༠༡༧ ཟླ་ ༡༡ ཚེས་ ༣༠ བར་བྱང་ཨ་རིའི་སྐུ་ཚབ་དོན་གཅོད་ཀྱི་ལས་འགན་ལོ་གཅིག་དང་ཟླ་གསུམ་བཞེས་རིང་། རེས་གཟའ་སྤེན་པ་ཉི་མའི་གུང་གསེང་ཉིན་གྲངས་ ༥༠ ལྷག་བློས་བཏང་གིས་ཆབ་སྲིད་དང་འཛིན་སྐྱོང་གིས་མཚོན་པའི་སྤྱི་པའི་ལས་དོན་འབའ་ཞིག་བསྒྲུབས་ཏེ།  བོད་རིགས་ཚོགས་པ་ཁག་ ༢༩ ནང་ནས་ ༢༦ ལ་ཆེད་བསྐྱོད་དང་། ཆོས་ཚོགས་ཁག་ ༥༠ བརྒལ་བར་མཇལ་བཅར། གྲོས་ཚོགས་གོང་འོག་གི་འཐུས་མི་དང་། མངའ་སྡེ་ཁག་གི་གྲོས་ཚོགས་འཐུས་མི། དེ་དག་གི་ལས་བྱེད། ཕྱི་སྲིད་ལས་ཁུངས་དང་། སྲིད་འཛིན་ཕོ་བྲང་གི་གནད་ཡོད་དཔོན་རིགས་མཇལ་འཕྲད་ཀྱིས་བོད་དོན་ཞུ་སྐུལ་དང་། རྒྱ་རིགས་ཤེས་ཡོན་ཅན་དང་། མང་གཙོ་དོན་གཉེར་ཅན་མང་པོའི་ལྷན་བགྲོ་གླེང་དང་། བཞུགས་མོལ་སོགས་རྣམ་པ་ཅི་རིགས་ཀྱི་མཇལ་འཛོམས། བོད་དོན་རྒྱབ་སྐྱོར་ཚོགས་པ་དང་། བོད་ཀྱི་གྲོགས་པོ་རྣམ་པར་འབྲེལ་གཏུག་རིམ་པར་གནང་བ་དང་། གྲོས་ཚོགས་འོག་མའི་ཚོགས་གཙོ་ལྕམ་སྐུ་ནན་སེ་པོ་ལོ་སེ་མཆོག་བཞུགས་སྒར་དྷརྨ་ས་ལར་གདན་ཞུས་ཀྱི་ལས་དོན་ཁག་བདེ་བླག་ངང་གྲུབ་ཡོད།

ཕྱི་ལོ་ ༢༠༢༡ ལོའི་སྲིད་སྐྱོང་འོས་མིར་བཞེངས་ཏེ་མང་མོས་བདམས་ཐོན་བྱུང་བ་ལྟར། ཕྱི་ལོ་ ༢༠༢༡ ཟླ་ ༥ ཚེས་ ༢༧ ཉིན་ལས་ཁུར་དམ་འབུལ་ཞུས་ཏེ་སྲིད་སྐྱོང་གི་མཛད་འགན་བཞེས་མུར། ཆོས་རིག་དང་། ནང་སྲིད། དཔལ་འབྱོར། འཕྲོད་བསྟེན་བཅས་ཀྱི་བཀའ་བློན་གཅིག་ལྕོགས་གནང་བཞིན་པ་བཅས།།